8 800 080 15 05
kense@plibrary.kz
2018 жылдың ақпанында Оңтүстік Қазақстан облыстық тарихи-өлкетану мұражайында «Н.Назарбаев: дәуір, тұлға, қоғам» көшпелі кешен көрмесі өз жұмысын бастайды. Қазақстан Республикасының Тұңғыш Президенті – Елбасы кітапханасының ұйымдастыруымен жүзеге асырылатын жоба аясында халықаралық ғылыми конференция, аймақтық кәсіби сессия, шолу және тақырыптық экскурсиялар және Қожа Ахмет Яссауи атындағы ХҚТУ (Түркістан қ.) негізіндегі көшпелі экскурсиялары іспетті бір қатар іс-шаралар өтеді. Көшпелі жоба алғаш рет 2017 жылдың қарашасында Алматы қаласында ұсынылған болатын. Жоба қатысушылары мен көрме келушілерінің саны 75 мыңнан астам Алматы және Алматы облысы тұрғындарын құрайды.
Биылғы жоба облыстық тарихи-өлкетану мұражайындағы Елбасы кітапханасының жинақтарынан жасақталған «Н.Назарбаев: дәуір, тұлға, қоғам» қор көрмесінің ашылу салтанатынан басталады.
Көрменің негізгі мақсаты – Мемлекет басшысы Н.Ә. Назарбаевтың тәуелсіз Қазақстан қалыптасуындағы шешуші рөлін жан-жақты көрсету. Келушілердің назарына Елбасы кітапханасының архив, кітап, музей қорларынан алынған материалдар ұсынылады. Олардың қатарында Елбасының жоғары мемлекеттік марапаттары, Құран топтамасы, мемлекет басшылары мен отандық авторлардың қолтаңбасы бар кітаптар, сондай-ақ Мемлекет басшының шет тілді еңбектері бар. Көрме «Елбасы қызметінің хроникасы» интерактивті бөлімінен, цифрлық фото альбомдар, деректік кинохрониканы көруге арналған видеозона секілді бірнеше блоктан құралған. Келушілер «Елбасы кітапханасы» таныстыру көрмесімен таныса алады.
Жоба аясында «Көрме» кешенінде ғалымдарға, мектеп оқытушыларына, кітапхана, архив, музей қызметкерлеріне арналған «Елбасы кітапханасының ақпараттық ресурстары» аймақтық кәсіби сессиясы өтеді.
Елбасы кітапханасы көшпелі жобасының Оңтүстік Қазақстан облысындағы тұсаукесеріне орай, «Түркістан» концерт залында ҚР Мемлекеттік күзет қызметі Президенттік оркестрінің концерті өтеді.
М.Әуезов атындағы Оңтүстік Қазақстан мемлекеттік университетінде сарапшылар мен талдаушылардың, түрлі мемлекет ғалымдарының, профессорлар мен мұғалімдердің, сондай-ақ шетелдік және отандық жоғарғы оқу орындары студенттерінің қатысуымен «Н.Назарбаев феномені: саяси ұстанымдар мен бастамалар» республикалық ғылыми-тәжірибелік конференциясы, сондай-ақ «Әлем таныған Елбасы» кітап көрмесінің ашылу рәсімі өтеді. Қожа Ахмет Ясауи атындағы Халықаралық қазақ-түрік университетінде (Түркістан қ.) «Тарихи таңдау» көшпелі экскурсиялары жүргізіледі.
Көрменің барлық жұмыс күнінде Оңтүстік Қазақстан облысының тұрғындары мен қонақтары шолу және тақырыптық экскурсияларға қатысып, қор көрмесімен таныса алады. Олардың назарына Елбасы кітапханасы қызметінің негізгі бағыттары да ұсынылады.
Қазақстан Республикасының Тұңғыш Президенті – Елбасы кітапханасының жобасы Шымкент қаласы мен Оңтүстік Қазақстан облысының қалың жұртына арналады. «Н.Назарбаев: дәуір, тұлға, қоғам» көрмесі 2018 жылдың мамыр айына дейін жалғасады.